印

忘．放

2006年06月12日 · Posted in: 生活, 隨心

忘了自身的存在，放下了我，如眼皮跳動睫毛拍翼，縱有遮擋視線的時候，郤從不為此短暫失明而有絲毫驚恐或感到被干擾而煩躁，只有，完全沒察覺的尋常當然。

就這樣，一切一切，亦變得不再重要。

按此回應回應的RSS 暫時未有引用通告 (0)

剪髮雜記

2006年06月10日 · Posted in: 隨心

再次一口氣把頭髮剪掉，今次，剪去了六吋。忘記多少年沒蓄短髮了，原來，已不再介意。

對上一次剪髮已相隔半年，剪髮之餘還可順道跟髮型C聚聚舊。

「最近有咩搞呀？」
「無咩搞，都係咁啦，你呢？」
「我唔係幾掂囉，財運認真麻麻，係喎，你幾時同我睇下個八字呀？」
「八字？我等左你九年啦，由上年話俾到今年。」
「哈！係喎，我仲未俾你喎，今年好似係狗年呀可？哈！真係等左狗年。」
「你知就好啦，拿！呢樣野我唔會吹你架，因為我都仲有好多盤未睇。嘻！」
「你個衰野呀……喂！有無拍拖唧？」

「你都好耐無剪到咁短啦。」
「係呀，真係好耐啦，剪左幾多吋話？」
「都有成六吋。」
「嗯…………. 」
「嘩！你吹到我個頭咁爆既？」
「風筒笠左個罩嘛，係會鬆Ｄ架。」
「你吹到我好似Ｄ有錢太太咁呀。」
髮型C對眼即時反白。
「你吹到我咁，一陣間要去high tea襯返個頭先得啦。」
「哦！去隔離個間茶餐廳high tea呀？！」
XDDDDDD

「仲有無飲紅酒呀？」
「無呀，我都唔飲紅酒既，飲唔慣呀。」
「個時你都飲左成杯格？」
「邊有呀？個時你都係倒左少少俾我試咋嘛。」
「我個晚飲左隻幾好架。」
「係？」
「係呀，我俾你睇下。」
然後，髮型C把手伸到臀部位置，動作似是要把東西掏出來。
「哈！你收埋左支酒係個patpat度呀？！」XDDD
「係呀，係個patpat摷支酒出黎俾你飲呀。」
原來，髮型C掏出來的是手機，內裡貯存了紅酒的照片。
「呢支幾好架，又唔貴。」
「易唔易入口架？咁即係幾錢支呀？」
「你飲岩啦，七十幾蚊支咋嘛。」
「其實你俾我睇我都唔識，不如你抄個名俾我啦。」
「好，我抄個名俾你啦，不過支野要去到石崗買。」
「石崗？咁遠呀…….. 」
「你可以睇下其他地方有無得買既。」